މެދުދެކުނު ޕްރޮވިންސް ސްކޫލުތަކުގެ އިސްވެރިން ގެ މަހާސިންތާގައި އެކުލަވާލި ސިޔާސަތުތައް ޢާއްމުކޮށްފި

އޮކްޓޫބަރ 19 ން 23 އަށް ތ.ވޭމަންޑޫގައި ކުރިއަށްދިޔަ މެދުދެކުނު ޕްރޮވިންސް ސްކޫލުތަކުގެ އިސްވެރިންގެ މަހާސިންތާގައި އެކުލަވާލި ޕްރޮވިންސް ލެވަލްގެ ސިޔާސަތުތައް މެދުދެކުނު ޕްރޮވިންސް އެޑިޔުކޭޝަން ޔުނިޓްގެ ވެބްސައިޓްގައި ޢާއްމުކޮށްފިއެވެ. މި ސިޔާސަތުތަކަކީ 2011 ވަނަ އަހަރުގެ ދިރާސީ އަހަރު ފެށުމާއެކު ޢަމަލުކުރަން ފެށޭނެ ސިޔާސަތުތަކެއް ކަމުގައި މެދުދެކުނު ޕްރޮވިންސް އެޑިޔުކޭޝަން ޔުނިޓުން ހާމަކުރައްވައެވެ. މި ސިޔާސަތުތަކުގެ މައިގަނޑު ބޭނުމަކީ ޕްރޮވިންސްގެ ސްކޫލުތަކުގައި ތަފާތުކޮށް ޢަމަލްކުރަމުން އަންނަ ބައެއް  މުޙިއްމު ކަންކަން ނިމުމަކަށް ގެނެސް ، އެ އުޞޫލުތަކާއި ޤަވައިދުތަށް  އެއް ހަމައަކަށް، އެއް އުޞޫލަކަށް ބަދަލުކުރުމެވެ. މި ސިޔާސަތުތަކަށް ޢަމަލްކުރަން ފެށުމުން، މެދުދެކުނު ޕްރޮވިންސްގެ ހުރިހާ ސްކޫލަކީވެސް ޕްރޮވިންސްއިން ކަނޑައަޅާ ހަމަތަކާ އުޞޫލުތަކާ އެއްގޮތަށް އަމަލްކުރެވި، ޕްރޮވިންސްގެ އަތްފޯރާ ހިސާބުން ގާތުން މޮނިޓަރކުރެވިގެން ހިނގަމުންދާ ސްކޫލުތަކަކަށް ބަދަލުވެގެންދާނެއެވެ. އަދި ސްކޫލުތަކުގައި ގެންގުޅެމުން އަންނަ އަމިއްލަ އުޞޫލުތަކާއި، ޤަވައިދުތައް ޕްރޮވިންސް ލެވަލްގެ ސިޔާސަތުތަކަށް ބަދަލުވެ، ހަމަހަމަކަން ޤާއިމްކުރެވޭނެއެވެ. މި ގޮތުން އެކުލަވާލާފައިވާ ސިޔާސަތުތަކަކީ މިނިސްޓްރީ އޮފް އެޑިޔުކޭޝަނުން އެކުލަވާލާފައިވާ ސިޔާސަތުތަކާ ފުށު ނާރާ ގޮތަށް އެކުލަވާލެވިފައިވާ ސިޔާސަތުތަކެއް ކަމަށް މެދުދެކުނު ޕްރޮވިންސް އެޑިޔުކޭޝަން ޔުނިޓުގެ ޕޮލިސީ، ޕްލޭނިންގް، ސްޕަވިޒަން އެންޑް ކޮލިޓީ އިމްޕްރޫވުމަންޓް ވިންގުން ހާމަކުރައްވައެވެ. އަދި ކުރިއަށް އޮތް ތަނުގައި ޕްރޮވިންސްލެވަލްގެ އިތުރު ސިޔާސަތުތައް އެކުލަވާލެވި ޢާއްމުކުރެވޭނެކަމުގައި މެދެދެކުނު ޕޮރޮވިންސްގެ އެޑިޔުކޭޝަން ޔުނިޓްގެ ޕޮލިސީ، ޕްލޭނިންގް، ސްޕަވިޒަން އެންޑް ކޮލިޓީ އިމްޕްރޫވްމަންޓް ވިންގުން ހާމަކުރައްވައެވެ.

މިގޮތުން މިހާރު ޢާއްމުކުރެވިފައިވާ ސިޔާސަތުތައް ތިރީގައި މިވަނީއެވެ. ( ތިރީގައިވާ ސިޔާސަތުތައް ޑައުންލޯޑް ކުރެއްވުމަށް ކުލިކް ކޮށްލައްވާ )

1-    މެދުދެކުނު ޕްރޮވިންސް ސްކޫލުތަކުގެ ދަރިވަރުންގެ ޢާއްމު ޤަވައިދު އަދި އިސްލާޙީ ފިޔަވަޅު

2-    މެދުދެކުނު ޕްރޮވިންސް ސްކޫލުތަކުގެ އެސެސްމަންޓާ ބެހޭ ސިޔާސަތު

3-    މެދެދެކުނު ޕްރޮވިންސް ސްކޫލުތަކުގެ ދަރިވަރުން ސްކޫލަށް ވެއްދުމާއި އެއް ގުރޭޑުން އަނެއް ގްރޭޑަށް ބަދަލުކުރުމާ ބެހޭ ސިޔާސަތު

4-    މެދުދެކުނު ޕްރޮވިންސް ސްކޫލުތަކުގެ ދަރިވަރުންނަށް އިނާމުދިނުމާ ވަނަތަކުގެ ކެޓަގަރީތައް ކަނޑައެޅުމާ ބެހޭ ސިޔާސަތު

5-    މެދުދެކުނު ޕްރޮވިންސް ސްކޫލުތަކުގައި ޕްރިފެކްޓް ބޯޑު އެކުލަވާލުމާ ބެހޭ ސިޔާސަތު

6-    މެދުދެކުނު ޕްރޮވިންސް ސްކޫލުތަކުގައި ދަރިވަރުންގެ ޖަމްޢިއްޔާ އެކުލަވާލުމާބެހޭ ސިޔާސަތު

7-    މެދުދެކުނު ޕްރޮވިންސް ސްކޫލުތަކުގެ ދަރިވަރުން ބޭނުންކުރާ ޓެކްސްޓް ފޮތް ދަރިވަރުންގެ އަތުން ނެގުމާއި، ދަރިވަރުންނަށް ޓެކްސްޓް ފޮތް ދޫކުރުމާ ބެހޭ ސިޔާސަތު